માલમ મોટાં હલેસાં તું માર

માલમ મોટાં હલેસાં તું માર,
મારે જાવું મધદરિયાની પાર
મેણું માર્યું છે મને ભાભલડીએ,
દે’ર આળહનો સરદાર;

હે... ભાઈ કમાય ને ભાઈ ઘોડલાં ખેલવે,
એનો બળ્યો અવતાર રે...માલમ

જાવું છે મારે જાવા બંદરે જ્યાં
લખમીનો નહિ પાર
હે... જાવે ગિયા કોઈ પાછા ન આવે,
આવે તો બેડલો પાર રે...માલમ

જાવું છે મારે સિંહલદ્વીપમાં
પરણવા પદમણી નાર;
હે... મોતીડે પોંખે જો ભાભલડી મારી
તો તો જીવવામાં સાર રે...માલમ

કેસરભીના તમે જીવો ભાભલડી મારાં
જીવો જીભલડીની ધાર;
હે... મેણા મારીને મારી મતિ સુધારી
ખોલ્યા તે મનના દ્વાર રે...માલમ

માલમ મોટાં હલેસાં તું માર,
મારે જાવું મધદરિયાની પાર